ஹிரண்யம்

உலகில் செல்வத்திற்கு பல பெயர்கள் கொடுக்கப்பட்டாலும் ஹிரண்யம் என்ற பெயரில் எனக்கு ஒரு ஈர்ப்பு உண்டு. ஹிரண்யம் என வார்த்தையை நீங்களும் சொல்லிப்பாருங்கள் ஒரு கம்பீரம் வரும். ஹிரண்யம் அதிகமாக வைத்துகொண்டதால் ஒரு அசுரனுக்கு ஹிரண்யகசிப்பு என பெயர். அவனைத்தான் நரசிம்ம அவதாரத்தில் வயிற்றை பிளந்து வதம் செய்தார் ஸ்ரீ நாராயணர்.

பணம் ஒருவனுக்கு வந்துவிட்டால் அவனின் ஆட்டம் தாங்கமுடியாது என்பதற்கு ஹிரண்யகசிப்பு ஒரு உதாரணம். ஹிரயண்ய கர்ப்பா என்ற ஒரு இடம் உண்டு. அதாவது செல்வத்தின் கருவரை என அர்த்தம். லக்‌ஷ்மி இங்குதான் இருப்பாளாம். குபேரன் அவளின் ஃபண்டு மேனேஜர். இவர்களின் செல்வம் முழுவதையும் எடுத்துகொண்டன் கசிப்பு.

ஹிரண்ய கசிப்பு யாராலும் வெல்ல முடியாத வரம் வாங்கி இருந்தானாம். ஹிரண்ய கசிப்பு இப்படித்தான் எப்பொழுதும் என சொல்ல முடியாது, ஆனால் எப்பொதும் இப்படித்தான் என சொல்லாம்.

அவனின் தந்தை ஒரு மகரிஷி. அவர் சந்தியாகாலத்தில் தியானத்தில் இருக்கும் பொழுது அழகாகவும் தேஜசாகவும் தெரிந்தார். அவரின் மனைவிக்கு அவர் மேல் மோகம் வந்து தன்னுடன் இணைய சொன்னாள். அப்பொழுது சந்தியாகாலம் அதனால் இணைய கூடாது என மறுத்தார். மனைவி கேட்டும் இணையவில்லை என்பது அதர்மம் என்றார் மகரிஷியின் மனைவி. தர்மவழியில் இருக்கும் மகரிஷி இணைந்ததால் இரட்டைகுழந்தை பிறந்தது அதில் ஒருவன் தான் ஹிரண்யகசிப்பு. அவனின் தம்பியும் ஒரு அசுரனே.

நம் சாஸ்திரம் என்ன சொல்லுகிறது தம்பதிகள் இருவரும் இணைகிறார்கள் என்றால் அது அவர்களின் சொந்தவிஷயம். இணைந்து குழந்தை பெறுகிறார்கள் என்றால் அது சமூகம் சார்ந்த பொது விஷயம். அதனால் குழந்தை பெற்றுக்கொள்ள இணையும் பொழுது நேரம் காலம் அவசியமாம். இன்று எத்தனையோ தம்பதிகள் எத்தனையோ ஹிரண்யகசிப்புவை பெற்று எடுத்திருக்கிறார்கள். மகரிஷியாக இருந்து சந்தியாகாலத்தில் கூடியதற்கே ஹிரண்யகசிப்பு மகன் என்றால் சாதாரண ஆசாபாசத்துடன் பெற்றால். ஆண்டவா...!

ஒரு ஹிரண்யன் இருந்தால் நரசிம்மர் வரலாம். இங்கே நரசிம்மர்கள் அவுட் ஆப் ஸ்டாக். எப்பொழுதும் மனது எதிர்மறையாகவே சிந்திக்கும். ஹிரண்யர்கள் பலர் வந்துவிட்டார்கள் என்றால் அவர்களுக்கு பிறக்கும் குழந்தைகள் எல்லாம் பிரகலாதர்கள் தானே? அப்பொழுது பக்திமான் பிரகலாதன் இருக்க வேண்டுமானால் ஹிரண்யர்கள் இருக்க வேண்டுமல்லவா?

பணம் வந்து ஹிரண்ய கசிப்பு ஆடினான் என்றேன். அது எப்படி என்றால் தேவலோகத்தையும் அனைத்து லோகத்தையும் தனது கட்டுப்பாட்டில் கொண்டுவதான். பணம் இருந்தால் அதிகாரம், பதவி என அனைத்தும் வாங்கிவிடலாம். தேவலோகம் என்பது ஒன்றும் இல்லை. நம் எல்லோருக்கு உள்ளேயும் ஹிரண்ய கசிப்பு இருக்கிறார். இல்லையென்றால் கோவிலில் சிறப்பு தரிசனம், அரசு அலுவலகத்தில் லஞ்சம் என அனைத்திலும் ஹிரண்ய வேலை செய்வோமா?.

ஹிரண்யம் என்ற பணம் வேலை செய்ய வேண்டுமானால் மனம் என்ற கருவி வேண்டும். ஆயிரம் ரூபாய் நோட்டு எடுத்து ஒரு பசுமாட்டிடம் காண்பியுங்கள் அதன் கண்கள் விரியாது. இதே ஒரு மனிதனிடம் காண்பித்தால் அவனுக்கு அங்கங்களில் பூரிப்பு தெரியும். மனிதனிடம் புல்லுக்கட்டை காண்பித்தால் ஒன்றும் நடக்காது. அவர் அவர் பணம் அவர் அவருக்கு.

மனம் என்பது ஒரு அதிசய உறுப்பு. ஆம் மனிதனின் மனம் ஒரு உறுப்புதான்.மனம் எங்கே இருக்கிறது என ஒருவரிடம் கேளுங்கள் தன் உடலுக்கு வெளியே இருக்கிறது என சொல்ல மாட்டார். உடலுக்கு வெளியே இல்லையென்றால் மனம் ஒரு உறுப்புதானே?

மனதை எப்படி கட்டுபடுத்துவது என என்னிடம் கேட்ப்பார்கள். மனதை நிற்க வைத்து ஒரு கயிரை எடுத்து வலமாக இருமுறை இடமாக இருமுறை கட்டுங்கள் என்பேன். அது எப்படி என கேட்டால் மனம் என்ற ஒன்று இருந்தால் தானே அது கயிறு ஒன்று இருப்பதை சிந்திக்கமுடியும்? இல்லாத ஒன்றையா கட்ட சொல்லுகிறேன். இருக்கும் மனதை கட்டுங்கள்.

ஆனால் மனது நீங்கள் நினைப்பது போல அல்ல, அதை கட்டுப்படுத்த முடியாது. மனம் எப்பொழுதும் உங்கள் கட்டுப்பாட்டில் இருக்காது. இப்பொழுது கூட பாருங்கள் உங்கள் மனது என் கட்டுப்பாட்டில் இருக்கிறது. உங்கள் மனதை நான் வைத்திருக்கிறேன். இதை சோதிக்கலாமா? இந்த வரிகளுக்கு பிறகு இரண்டு பத்திகளை எழுதுகிறேன் மனது உங்கள் கட்டுப்பாடில் இருந்தால் மேற்கொண்டு அதை படிக்காமல் விட்டுவிடுங்கள் பார்க்கலாம்...!

மனது ஒரு ரப்பர்பேண்ட் போல வளையக்கூடியது. ரப்பர் வளையத்தை எடுத்து அதனுள் என் விரல்களை நுழைத்து இழுத்து விளையாடுவதை போல உங்கள் மனதையும் செய்ய முடியும். பாருங்கள் உங்கள் மனத்தில் எனது இரண்டு விரல்களை நுழைத்துவிட்டேன். இப்பொழுது வலமாக இழுக்கிறேன். உங்கள் மனம் வலப்பக்கம் அதிகரிக்கிறது.

விட்டுவிட்டேன். இடமாக இழுக்கிறேன் இடப்பக்கம் பாருங்கள் பெரிதாகிவிட்டது. அதையும் விட்டுவிட்டேன். இரண்டு பக்கமும் மாறி மாறி இழுக்கப்போகிறேன். தயாரா?

வலது ... இடது .... வலது ....
வலது ... இடது ..
வலது ... இடது ..
வலது ... இடது ..
வலது ... இடது ..
வலது ... இடது ..
வலது ... இடது ..
வலது ... இடது ..
இலது ... வடது ..
வலது ... இடது ..
வலது ... இடது ..
வலது ... இடது ..
வலது ... இடது ..
வலது ... இடது ..
வலது ... இடது ..

சரி உங்கள் மனதை இழுக்கவில்லை விட்டுவிட்டேன். மனதை ஆட்டுவிப்பது உங்கள் புலன்கள் தான். வலது இடது சொல்லும்பொழுது நடுவில் மாற்றி சொன்னேன் உடனே அதை கண்டு கொண்டீர்கள் தானே? உங்க புலன் மனதை இயக்குகிறது. உங்கள் புலனை மனம் மூலம் நான் இயக்குகிறேன். மனது இல்லை என்றால் இத்தனை பிரச்சனை இல்லை. உங்கள் மனம் என்னிடம் சிக்கி இழுபடாது.

உங்கள் மனம் எனது கருத்தில் தொங்குவதில்லை. எனது வார்த்தை ஜாலத்தில் தொங்குகிறது. எனது வார்த்தையை வைத்து கொண்டு என்ன செய்வீர்கள். ஆனாலும் இதை நீங்கள் படிக்க வேண்டி இருக்கிறது..

மனம் இருந்தால் பணம் பண்ணலாம். பணம் இருந்தால் மனம் பண்ண முடியுமா? ஹிரண்யம் என்பது மனசு இருக்கும் வரைதான். ஹிரண்ய கர்ப்பா என்றால் எங்கோ இருக்கும் இடமில்லை. உங்களுக்குள் ஹிரண்ய கர்ப்பம் இருக்கிறது. பணத்தை பிரசவிக்கும் கருப்பை ஹிரண்யம். மனம் இயங்கும் வரை கர்ப்பம் தரிக்க முடியாது. மனம் இருந்தால் நீங்கள் மலடுதான். சரி உங்கள் மனதை நான் ஏன் வைத்து விளையாட வேண்டும்? மனதை விட்டு விடுகிறேன்.

இப்பக்கத்தை மூடிவிடுங்கள்.

அனைத்தும் சுபம்.